مين يقرا و مين يكتب
بقلم..مرقص إقلاديوس
.........
قالولى
ماحدش بيقرا إللى بتكتبه.
قلتلهم
و أنا مش هابطل كتابة.
و إن كان طبعا
الموضوع فيه بعض الغرابة.
أصل الحقيقة
أنا مش باكتب
انا بأتملى الكلام.
حتى بيسموه إلهام.
وتقتضى الأمانة
إنى اوصل الكلام.
ما ينفعش
أخد الرسالة
أدفنها تحت التراب.
طب و هارد عليه
أقوله إيه
يوم الحساب.
إن كان الفلاحين
بيبدروا فى الأرض حب.
أنا باعتبر نفسى فلاح
بيبدر فى القلوب حب.
و إن كان العالم
بيضيع عمره عشان اختراع.
أنا مش أقل منه
أنا صنعتى الإبداع.
حتى الفلاسفة
عجباهم الفلسفة
و طايرين بيها فى العلالى.
طب ما أنا فيلسوف
فلسفتى بسيطة
بأقولها
فى شوية غناوى.
طب ما بدل
ما أبطل أنا أكتب.
ما تجرب تقرالى.
يمكن الكلام يصيدك.
و تبقى للقصيد غاوى.
ياريت تقرا كلامى
بقلبك مش بعقلك.
و يا ريت
بعد كدة كل ما تصلى.
تدعيلى دعوة،
من ضمن الدعاوى.
ملاح بحور الحكمة
مرقص إقلاديوس
ليست هناك تعليقات:
إرسال تعليق