عرفت ليه
بقلم ..مرقص اقلاديوس
...........
ليه دايما عمرنا ما بنغنى
للى هيكون.
و بنغنى للى كان.
و دايما بنغنى لليل
و عمرنا ما بنغنى للنهار.
و بنغنى لقمر من نور
و ما بنغنيش لشمس من نار.
و طول عمرنا
و فى كل وقتنا
بنغنى للحب
و بنغنيش للحنان.
أصل إمبارح
تقدر تقول إنه
لكن بكرا
ما تقدرش تقول
حاجة عنه.
و إمبارح تقول
عملت و سويت
هوا الكلام بيدفعوا تمنه.
و تبقى الحكاية سطر
و إنت تكتب كتاب
طبعا ما إنت بتاخد
من منه تحط فى منه.
و الليل يا صاحب ستار
صحيح فيه ناس
بتقضيه تهدج و صلاة.
لكن كتير بيقضوه
بعيد متغربين
فى ابيار مالهاش قرار.
إنما النهار واضح فضاح
الخير فيه باين
و الشر فيه باين
و طول عمر النهار وضاح.
و بنغنى لقمر من نور
عشان القمر
بييجى مع الليل
و الليل بيحب السهر.
و يا سيدى يا سيدى
على ليل و قمر.
و يا سلام لو تكمل
و يبقى سهران
معاك حبيبة قمر.
لكن الشمس نار
و النهار عمل
و شقا و مرار .
و البنى آدم فى زمانا
بقا مسكين.
عشان اللقمة
بيمشى بالمشوار.
و طول عمرنا
بنغنى للحب.
طب ما طبعا
اممال هنغنى لإيه.
إوعاك تكون
ما غنتش للحب
أصلك تبقا ما حبتش
و ما اشتقتش لحبيبك
و غرقت فى بحر عينيه.
إنما الحنان ..
يا سلام على الحنان
الحنان يرجع
الإنسان انسان.
يرجعه صدر حنين لتعبان.
يرجعه قلب حنين لحيران.
يرجعه عقل حنين لقلقان.
تصدق بإيه
لو ربنا ما كانش
رحيم بينا
كان عمل إيه فينا
طب اديك شايف
إحنا بنعمل إيه
فى بعضينا.
انما لأن ربنا رحيم
إدانا الحنان.
أنا باستغرب أوى
من إللى نفسه
يبقى ملاك
طب إحنا
إنت و أنا و كلنا
كل واحد مننا
يا ريته بس
يبقى إنسان
ملاح بحور الحكمة
مرقص اقلاديوس
ليست هناك تعليقات:
إرسال تعليق