خطاب
عبدالمنعم عدلى..مصر
ولدى وإبنى وحشايا
وحشتنى كثير
غايب عنى
ليك شهور
عامل إيه ياولدى
فى الجو العسير
وخبرنى عن أصحابك
مؤمن ومحمد
وتامر وبولس
عاملين إيه وياك
الجو صعب
والمطر كتير
شدوا حيلكم ياولادى
وبالصبر هنهزم الأعادى
أنا فاكر أخر مرة
عندما كنا بنأكل سوى
والواد بولس
مهرج كبير
وجرى وأخذ
كل الفطير
وجريتوا وراءه
ووقعتوا فى
الحوض الكبير
وسافرتوا إلى الجبهه
وكأنها إمبارح
أمك إتوحشتك كثير
وإخواتك عبدالله ومحمود
قول لى ياولدى
مافيش حد نازل أجازة
نفسى أبعثلك
حلة محشى وبطايا كمان
وإبعث لى خطاب
أطمئن عليك
وأشم ريحك فيه
وأخيرا ياولدى
مش هفكرك
إن الأرض عرض
والدم غالى
والأرض أغلى
من الدم
وأستودعتك عند ربك
ومرت الأيام
وجالى جواب
وكأنه أخر كلام
بالدم إنكتب
فى الحال
والدى العزيز
الجو صعب
والعرض أصعب
يمكن يكون
أخر كلام
وأنا على خط النار
كل يوم شهيد
والدم يسيل
بس الأهم إنتم
نموت نموت
ونحافظ على الحدود
والأرض فيها
نسور ووحوش
بتحافظ عليكم
وهي بتموت
وسلم على أمى
وعبدالله ومحمود
وقول لهم أخوكم
أسد جسور
ومهما طال الزمن
عائد ورؤوس الشياطين
فى القبور
أما بولس
مابيبطل تهريج
ومابيهمه شئ
بلغ سلامى للأحباب
عمى الغالى
أنا بولس كنا
فى غارة مفاجئه
وإبنك البطل
فدانى من
نار العدا
مات شهيد
وأصبحت وحيد
حالف بالله
وبالمسيح وكل
كتاب مجيد
حالفين برمل بلادى
لنأخذ بتار إخواتى
إطمئن ياوالدى
كلنا أحمد
حتى لو شربت
الرمال دمائنا
ودى بدلة أحمد
ومعاها خطاب
بالدم مكتوب
كنت أنا المقصود
جرى احمد وفدانى
والشهيد لايموت
إستودعتك والدى
عند رب الشهيد
بقلمى عبدالمنعم عدلى
ليست هناك تعليقات:
إرسال تعليق